పదవులు కొట్టండి

సోనియాను తిట్టండి... పదవులు కొట్టండి

         నక్కను తొక్కితే లాభం కలుగుతుందన్న నానుడిలో నిజమెంతే తెలియదు కానీ, కాంగ్రెస్ పార్టీలో సోనియాను తిడితే పదోన్నతి లభిస్తుందన్న నమ్మకం మాత్రం రోజురోజుకూ బలపడుతోంది. సోనియాను చెడామడా తిట్టి కాంగ్రెస్ నుంచి బయటికి వెళ్లిన శరద్ పవార్, పి.ఎ. సంగ్మాలను ఇప్పుడు ఆ పార్టీ పల్లకీలో ఊరేగిస్తోంది. బోఫోర్స్ కుంభకోణంలో ఇటలీ కనెక్షన్ బయటపెట్టి, రాజీవ్ వంటింటి నుంచే వ్యవహారం నడిచిందని పార్లమెంటులో అర్థం తెలియని ఆంగ్ల పదాలతో కుండబద్దలు కొట్టిన జైపాల్ రెడ్డికి ఇప్పుడు సోనియమ్మ హయాంలో అగ్రతాంబూలం దక్కింది.

సోనియాను అవినీతి సామ్రాజ్యపు అధినాయకిగా వర్ణించి, కాంగ్రెస్ నేతల పంచెలు ఊడగొడతామని ఊదరగొట్టిన చిరంజీవి ఇంటికి బంపర్ ఆఫర్లతో కాంగ్రెస్ పార్టీ పల్లకీ పంపింది. దేవత, దయ్యం అనేవి పర్యాయపదాలన్నంతగా మార్చిమార్చి సంబోధించే కేసీఆర్ అంటే కాంగ్రెస్ హైకమాండ్ కు ప్రత్యేకమైన భయం.

నిలువుదోపిడీకి సిద్ధంగా ఉన్న నిజమైన భక్తులకు 10 జనపథ్ లో దర్శనం కరవవుతుంటే, తిట్ల దండకంతో కొట్లాటకు దిగిన వాళ్లకు ప్రత్యేక బ్రేక్ దర్శనం లభిస్తోంది. బహుశా ఇవన్నీ చూసేనేమో జగన్ కూడా కాంగ్రెస్ పై యుద్ధం ప్రకటించాడు... ఆయన అనుచరులు కవి చౌడప్ప సాహిత్యం చదివి మరీ బూతులు నేర్చుకుంటున్నారు, అమ్మగారి ఆగ్రహాన్ని అనుగ్రహంగా పొందడానికి.

ఇంకోవైపు తెలంగాణ ఇస్తం, తెస్తం అని మీసాలు తిప్పుకుంటూ గడ్డాలు పట్టుకుంటూ గల్లీ నుంచి ఢిల్లీదాకా డేకుతున్న తెలంగాణ కాంగ్రెస్ సీనియర్లకు అధిష్ఠానం పూచికపుల్లంత విలువ కూడా ఇవ్వడం లేదు. ఐనవాళ్లకు ఆకుల్లో కానివాళ్లకు కంచాల్లో వడ్డించే సోనియమ్మ వైనాన్ని ఇంతకాలం దగ్గరినుంచి చూస్తున్న కాకా ఉరఫ్ వెంకటస్వామికి ఇప్పుడు జ్ఞానోదయమైనట్టుంది. శరీరం సహకరించకపోయినా వీల్ చైర్ లో కూర్చువి కుంభస్థలంపై మాటల తూటాలు ఎక్కుపెడుతున్నాడు. ఏమో కాకా వ్యూహం ఫలించి రాష్ట్రపతి పదవి దక్కినా దక్కొచ్చు.

పి. శ్రీనివాసుల రెడ్డి.